Monika Kryemadhi deklaroi mbrëmjen e sotme në “Opinion” se dekreti i presidentit Meta ishte për të shpëtuar Edi Ramën. Ajo bëri edhe një kërkesë për bashkëshortin president, ku i tha se “Boll i dashuri Edi Ramës, nuk e shpëton dot”.
Kryetarja e LSI-së i dërgoi edhe një mesazh të drejtpërdrejtë për shefin e qeverisë: “Rama o të shpëtojë paratë, o të shpëtojë kokën e vetë. Nuk ka rrugë tjetër. Në politikë ke dy rrugë o të bësh para, o të bësh karrierë. Nuk i bën dot të dyja, tentoi një dhe është në dyert e gjykatës”.
Sipas saj opozita kërkoi standarde për zgjedhjet dhe daljen përpara përgjegjësisë të atyre që janë përfshirë në dosjet 184 dhe 339.
Kryemadhi tregoi se kryeministri Edi Rama është vetë ai që shikon filxhan, ndërsa ky i fundit e akuzon si fallxhore.
“Unë po iu them diçka që të jem e sinqertë. Atë zonjën që i paguan me rrogë që i shikon filxhanin, e ka këshilltaren e vetë. E ka punonjëse. Nuk po ia them emrin por po i them nofkën e gjermanishtes. T’ja shikoj filxhanin dhe t’ja shikojë mirë. Fati i Edi Ramës nuk është më në filxhan, as në letra fati as në horoskop”, tha zonja Kryemadhi.
