Kryetarja e LSI-së, Monika Kryemadhi tregon se ka kaluar gjithë natën para Teatrit Kombëtar, për të mbështetur artistët që kundërshtojnë vendimin për shembjen e godinës.
Në një prononcim për mediat, Kryemadhi tha se gjendja gjatë natës ishte e qetë dhe se askush nuk ka tentuar t’i largojë.
Por pavarësisht kësaj, Kryemadhi thotë se punonjësit e bashkisë ishin në gatishmëri të plotë dhe se janë larguar vetëm pas orës 5 të mëngjesit.
“Ne ishim një grup modest që qëndruam gjithë natën, ishte gjendje e qetë, nuk patëm asnjë problem, dhe kështu do të vazhdojmë. Nuk kanë tentuar të na largojnë, punonjësit e bashkisë ishin në gatishmëri të plotë, kishin besimin se ne do të largoheshim vetë. Kishte hyrje-dalje në Bashkinë e Tiranës. Rreth orës 5 të mëngjesit, kur e kuptuan që ne nuk do të lëviznim nga sheshi, ata u larguan. Kishte nga shoqëria civile, shumë artistë, që qëndruan këtu. Kjo do të jetë e organizuar nga të gjitha shoqatat, partitë politike të frontit opozitar dhe shumë artistë e qytetarë”, tha ajo.
