Kryetarja e LSI-së, Monika Kryemadhi ka folur lidhur me debatet brenda opozitës për djegien e mandateve. E ftuar në studion e “Opinion”, Kryemadhi tha se fillimisht ideja u propozua nga Berisha, më tej u arrit në dakordësi nga e gjithë opozita, pasi i përball me arrogancën dhe shkeljen e Kushtetutës nga mazhoranca.
“Ideja e djegies së mandateve është artikuluar në fillim nga Berisha. Më pas është mbajtur si ritëm nga analistët dhe mediat. Kemi pasur debate mes LSI dhe PD për djegien e mandateve. Ne ramë dakord të gjitha palët dakord, pasi konsumuam çdo element institucional. Mbasi ezauruam çdo institucion, nuk na ngeli gjë tjetër veç marrja e këtij vendimi, pasi u përballëm me arrogancën dhe shkeljen flagrante e kushtetutës nga ana e maxhorances. Ne dogjëm mandatet, sepse do ishim bashkëfajtor në kapjen e shtetit”, tha Kryemadhi në intervistën me Fevziu.
