Monika Kryemadhi është e vendosur të vijojë rezistencën ndaj kryeministrit Edi Rama. Ajo është shprehur duke paralajmëruar kreun e qeverisë, se mund të pësojë sërish ndonjë këpucë drejt kokës së tij. E para e LSI-së, Kryemadhi vijoi më tej duke deklaruar se ajo nuk do të kursehet duke hedhur këpucë, nëse Rama do tentojë të prekë deputetët e Lëvizjes Socialiste për Integrim.
“Rama ka hedhur 80 milionë euro për të intimiduar qytetarët në zgjedhje. Në katër vjet varfëroi shqiptarët për t’i blerë lehtë në zgjedhje. Atë do ai t’i kalojë ligjet, të mos ketë ndonjë këpucë kokës. Po goditi sërish ndonjë njeri, patjetër që do ketë ndonjë këpucë kokës. Po preku deputetët, do goditet sërish”-deklaroi ajo.
Kryemadhi ka reaguar edhe ne lidhje me batutat, që kryeministri i adresoi ndaj saj, ndërsa ka shtuar se kjo nuk më pëlqen dhe duhet të dalim nga kjo situatë batutash. Sipas saj, koha e batutave të Ramës tashmë ka përfunduar.
Kryetarja e LSI, tha se nuk është koha për batuta, por Rama duhet të shpjegojë dhe të zgjidhë problemin e naftëtarëve të Fierit.
“Unë dua të them se të dalim nga debati i batutave. Koha e batutave të Ramës ka ikur, nuk është modern sa ka qenë, kur merrej me publicitetin e Nanos dhe Metës. Tani ti lerë batutat dhe të merret me problemin e naftëtarëve, t’u japë pagat. Të luftojë korrupsionin dhe të ndalojë eksodin e shqiptarëve drejt Europës. Ti lemë batutat dhe të mendojmë për 2018, që të jetë një vit sa më i mirë për shqiptarët”-u shpreh ajo.
