Në një bashkëbisedim me gazetarët, kryetarja e LSI-së Monika Kryemadhi ka përshëndetur deklaratën e Komisionerit për Zgjerim i Bashkimit Europian, Oliver Varhelyi. Ai kërkon nga qeveria shqiptare që të presë këshillat e Komisionit të Venecias, përpara se të rivotojë në Parlament ndryshimet në Kodin Zgjedhor.
Kryemadhi është shprehur se opozita e bashkuar i qëndron marrëveshjes së 5 qershorit, e cila krijon një pikë garancie për ndërkombëtarët. Sipas Kryemadhit, kryeministri Rama nuk tregon gjë tjetër vetëm frikë, panik dhe mungesë besimi për zgjedhjet e 25 prillit.
“Ka qenë përfshirja në Këshillin Politik, një angazhim i vështirë për shkak të sjelljes arrogante. Ne i qëndrojmë marrëveshjes së 5 qershorit, e cila është një pikë që krijon një pikë garancie për ndërkombëtarët.
Por nga ana tjetër, Oliver Varhelyi ka bërë një kërkesë që mos tregohet arrogante dhe të presë. Rama nuk tregon gjë tjetër vetëm frikë, panik dhe mungesë besimi për zgjedhjet e 25 prillit. E përshëndes dhe e mirëpres deklaratën e Varhelyit. Beteja është 25 prilli, kur shqiptarët ti drejtohen votimit”, tha ajo.
