Kryetarja e Lëvizjes Socialiste për Integrim, Monika Kryemadhi në vijim të qëndrimit të saj ndaj kryeministrit Edi Rama e ka bërë të qartë domosdoshmërinë e largimit të këtij të fundit nga pushteti.
Pavarësisht se LSI ishte deri dje në pushtet, babëzia për të rimarrë pjesë në tepsinë e pushtetit po ndjek të njëjtën politikë si Edi Rama i djeshëm.
Këtë herë LSI nuk është e vetme. Nga pas ka edhe Partinë Demokratike, që drejtohet nga Lulzim Basha, që vjen krejtësisht me kuota të ulëta në këtë protestë opozitare.
LSI dhe PD e kanë cilësuar si një protestë popullore, duke caktuar datën 27 maj si ditën e protestës. Por lëvizjet politike të Bashës dhe Kryemadhit tregojnë të kundërtën.
Të dy liderët e opozitës kanë zbritur në bazë për të mbushur autobusët për të shtunën e ardhshme përpara kryeministrisë.
Pas një sërë vizitash në rrethe, Kryemadhi nuk ka harruar as zonat e kryeqytetit. Ndaj sot ajo zhvilloi një takim me banorët e njësisë numër 1 në Tiranë. Ajo kërkoi prej tyre që të bëhen pjesë e protestës me qëllim për të larguar kryeministrin Rama.
“Do luftojmë që gjithë shqiptarët të kenë një Shqipëri të barabartë, një drejtësi të barabartë. Një sistem të barabartë për të gjithë. Ne sot ju kërkojmë të gjithë të mos ndaloni deri më datë 27 janar, derë më derë, shtëpi më shtëpi, me miqtë e rrethin tuaj, të rinj e të reja, pensionistë e pensionistë që më 27 janar të jenë në bulevardin “Dëshmorët e kombit”. E them këtë jo për të treguar se njerëzit mbështesin LSI-në por për veten tonë, për të drejtat tona”, tha Kryemadhi.
Sipas Kryemadhit, edhe pse deri dje LSI ishte në pushtet, atë nuk e komplekson fakti se Edi Rama duhet rrëzuar me çdo kusht.
“Dëgjoni shpesh në TV nga tellallët e Edi Ramës se LSI-ja ka frikë. LSI nuk ka frikë nga asgjë. LSI vërtetë ka qenë 8 vjet në pushtet. Por sa ka pasur pushtetin, aq ka edhe mëkatet”, tha Kryemadhi duke e shoqëruar deklaratën me gjeste. Ajo tha se Shqipëria vjen para çdo bindjeje politike. “Në datë 27 janar duhet të jeni në protestë. Ju ftoj me gjithë zemër. Harroni bindjen politike. Duhet të vendosim Shqipërinë para çdo bindje politike”, u shpreh kryetarja e LSI-së.
Protesta e datës 27 janar ngjan me një rikthim në skenën e krimit, ku pushtetarët e djeshëm bashkë me LSI-në lanë 4 të vrarë në mes të bulevardit pas përplasjes për pushtet midis Edi Ramës, Ilir Metës dhe Sali Berishës në 21 janarin e 2011-s.
Të njëjtët aktorë zbresin në vendin e krimit, si për të kujtuar edhe një herë se babëzia për pushtet, si ai që kërkon ta mbajë dhe ai që kërkon ta rrëmbejë do të hajë gjithmonë koka qytetarësh të thjeshtë.
