Kryetarja e Lëvizjes Socialiste për Integrim, Monika Kryemadhi për herë të parë hodhi akuza të rënda ndaj kryebashkiakut të Tiranës, Erion Veliaj. Në një lidhje direkte në emisionin “Të Paekspozuarit”, Kryemadhi tha se Erion Veliaj jep leje ndërtimi për pastrim parash të drogës.
“Lali Eri ka dal në treg për të ofruar para dhe blen këshilltarë. Kush ka ndërmend të iki le të iki, por gojën e LSI, nuk e blen dot. Le ti japi licencat e taksisë elektrike, Endri Fugën dhe Olsi Ramën, dhe të japi, leje ndërtimi për pastrim parash të drogës“, deklaroi kryemadhi.
Deri në festat e nëntorit duket se marrëdhëniet e LSI-së me kryebashkiakun ishin të mira. Por reagimi i Kryemadhit, vjen në një kohë kur 4 këshilltarë të LSI-së votuan për buxhetin e Bashkisë së Tiranës, një vendim ky i njëanshëm nga linja politike e LSI-së.
Një ditë më parë, teksa Veliaj ka takuar gazetarët që mbulojnë Bashkinë e Tiranës, ka shpërthyer në të qeshura për çizmen që kryetarja e LSI-së i lëshoi kryeministrit Rama, ditën e hënë.
“Ka kërcitur çizmja tani” – është shprehur Veliaj, i cili ka lënë të kuptohet një kënaqësi për sulmin e Kryemadhit ndaj Ramës.
