Inspektori i Përgjithshëm i Inspektoratit Qendror, Shkëlqim Hajdari, priti sot në një takim Ministrin e Shtetit për Mbrojtjen e Sipërmarrjes, Eduard Shalsi. Në fokus të takimit, kanë qenë ndryshimet ligjore të iniciuara nga Inspektorati Qendror.
Gjatë fjalës së tij, Shalsi përgëzoi arritjet për formalizimin e kolonës së tretë të Reformës në Inspektime, duke patur sot në gjithë Inspektoratet Shtetërore dhe Bashkinë Tiranë, inspektime online të njoftuara paraprakisht, me dokumente standarde, bazuar në analizën e metodologjisë së riskut, nëpërmjet tabletave dhe kartës së inspektorit.
Gjithashtu, unifikimi i procedurës inspektuese bazuar dhe në Rregulloren e hartuar së fundmi nga Inspektorati Qendror, përcakton të gjitha fazat që duhet të kalojë një procedurë e rregullt inspektimi.
Rregullorja “Për përcaktimin e procedurës së Inspektimeve si një proces i rregullt administrative” u është prezantuar trupave inspektuese, të cilët me anë të një deklarate të nënshkruar marrin përsipër ta kryejnë procedure online bazuar në rregullat e përcaktuara në këtë Rregullore.
Po ashtu, Shalsi u njoh edhe me draft ndryshimet ligjore të propozuara së fundmi nga Inspektorati Qendror, në bashkëpunim me Inspektoratin e Përgjithshëm Francez, Projektin e Binjakëzimit kundër Korrupsionit, Dhomat e Biznesit vendas e të huaj, OECD dhe ekspertë ndërkombëtar dhe kombëtar në fushën rregullatore inspektuese. Ndryshimet e propozuara do të ndikojnë në ngritjen dhe forcimin e dy kolonave të tjera të Reformës në inspektime: Sistemi i rekrutimit dhe ai i karrierës.
Ngritja e Sistemit të rekrutimit dhe karrierës, do të kthejë trupat inspektuese në trupa profesionale, bazuar në meritokraci dhe të pavarur jashtë ndikimit politik.
Në mbyllje të takimit, ministri Shalsi theksoi mbështetjen maksimale nga ana e tij, të këtyre ndryshimeve, të cilat janë jo vetëm në interes të konsumatorëve por edhe biznesit vendas e të huaj.
