Situatën kriminale dhe shtimin e vrasjeve, kryebashkiaku i Sarandës, Adrian Gurma e lidh ngushtësisht me fluksin e të ardhurve sidomos gjatë sezonit veror. Në një intervistë në emisionin “Ora Verore”, ai ka pohuar se ngjarje jo të këndshme mund të ndodhin, pasi gjatë sezonit të verës, katërfishohet popullsia për shkak të turizmit.
Teksa ka bërë një bilanc e duke folur përmes shifrave, ai tha se Saranda në muajin gusht i katërfishon kapacitetet e veta. Gjatë sezonit veror janë 130-140 mijë banorë rezidentë bashkë më turistët, ndërkohë që në dimër janë te 43-45 mijë banorë.
Kryebashkiaku i Sarandës tha se paçkas situatave që agravojnë, me rëndësi është që ato të menaxhohen mirë nga strukturat e Policisë së Shtetit dhe mbrojtjes së territorit.
“Mund të them që raste sporadike ka pasur, ka dhe do të ketë, sepse Saranda në muajin gusht i katërfishon kapacitetet e veta. Në Sarandë tani që flasim ne mund të jemi te shifra 130-140 mijë banorë rezidentë bashkë më turistët, ndërkohë që në dimër jemi te 43-45 mijë banorë.
Gjithë ky fluks, patjetër që mund të ketë edhe ndonjë situatë jo të pëlqyeshme, por megjithatë e rëndësishme është që ato të menaxhohen mirë nga strukturat e Policisë së Shtetit dhe mbrojtjes së territorit, dhe e dyta që është më e rëndësishme nuk duhet dhënë konotacion negativ në media sepse, do krijojë një efekt negativ, sepse Saranda nuk e meriton”, shprehet Gurma.
