Sikundër e kanë thënë edhe më herët, kryebashkiakët e djathtë refuzojnë të largohen nga detyra, edhe pse të zgjedhurit e rinj nga radhët e Partisë Socialiste po presin procedurat ligjore, për të marrë zyrtarisht “stafetën”. Kryetari i Bashkisë së Kamzës, Xhelal Mziu, është shprehur se nuk do të lejojë që Rakip Suli, të ulet në karrigen e tij.
“Unë besoj se nuk varet vetëm nga unë. Besoj se shumica e qytetarëve do të jenë barrikadë e këtij grushti shteti”, tha kryebashkiaku i Kamzës, në një intervistë për “Top Channel”.
Në karrigen e tij, ai siguron se nuk do te ulet socialisti Rakip Suli. Sipas tij, nuk mundesh që të drejtosh një Bashki ku ke marrë vetëm 6 % të votave. Alternativa e vetme, sipas tij, është që të bëhen zgjedhje normale.
“Nuk mundet që të drejtosh një Bashki ku ke marrë vetëm 6% të votave. Do ta lë zyrën kur të bëhen zgjedhje normale. Janë 27 kryetarë Bashkish, që janë të gatshëm që të mbrojnë Kushtetutën, ligjin”, tha ai.
“Jam i sigurt që nëse do të kishte përplasje, mund të kishte edhe qindra të vdekur. Personi më i interesuar në këtë kontekst është vetëm kryeministri”, u shpreh Xhelal Mziu.
