Udhëheqësit e SHBA-së dhe Britanisë së Madhe kanë thënë se nuk ka humbur çdo shpresë për një zgjidhje diplomatike të krizës në Ukrainë, por paralajmëruan se situata mbetet e brishtë.
Në një telefonatë 40-minutëshe, Joe Biden dhe Boris Johnson ranë dakord që një marrëveshje ishte ende e mundur, pavarësisht paralajmërimeve për një veprim të afërt ushtarak rus.
Rusia gjithmonë ka mohuar planet për të pushtuar Ukrainën, pavarësisht se grumbullon më shumë se 100.000 trupa në kufi. Si pjesë e përpjekjeve diplomatike për të shmangur një pushtim të mundshëm, kancelari gjerman Olaf Scholz do të takohet me presidentin e Rusisë, Vladimir Putin më vonë të martën.
Pasi u kritikua për një përgjigje të ngadaltë fillestare, Scholz u takua me presidentin ukrainas në Kiev të hënën, duke thënë se nuk kishte “asnjë justifikim të arsyeshëm” për ngritjen e ushtrisë ruse.
Më shumë se një duzinë vendesh u kanë kërkuar qytetarëve të tyre të largohen nga Ukraina, dhe SHBA-ja ka thënë se bombardimet ajrore mund të fillojnë “në çdo kohë”.
Por në bisedën e tyre, Biden dhe Johnson thanë se mbetej një “dritare vendimtare” për diplomacinë dhe për Rusinë që të tërhiqet nga kërcënimet e saj ndaj Ukrainës, sipas një deklarate të Downing Street.
“Udhëheqësit theksuan se çdo inkursion i mëtejshëm në Ukrainë, do të rezultonte në një krizë të zgjatur për Rusinë, me dëme të gjera si për Rusinë ashtu edhe për botën”, citohet në deklaratë. Në një fjalim sfidues drejtuar kombit të hënën, presidenti i Ukrainës Volodymyr Zelensky shpalli 16 shkurtin – një datë e cituar nga zyrtarët amerikanë si një ditë e mundshme në të cilën Rusia mund të sulmonte – një “ditë uniteti” dhe vlerësoi forcën e ushtrisë ukrainase.
“Ne kemi me çfarë të përgjigjemi. Ne kemi një ushtri të madhe… kjo është një ushtri shumë herë më e fortë se tetë vjet më parë”.
Por ai tha se dëshiron të zgjidhë të gjitha çështjet përmes negociatave dhe diplomacisë. Presidenti ukrainas e përfundoi fjalimin e tij me një notë optimiste: “Tani mund të mendoni se është errësirë përreth. Por nesër dielli do të lindë përsëri mbi qiellin tonë paqësor”.
Burimi i lajmit: BBC. Përshtatur nga Tirana Today
