Miliarder i mirënjohur kinez, Sun Dawu, i cili drejton një prej bizneseve më të mëdha private në sektorin e bujqësisë në provincën Hebei, është dënuar me 18 vjet burg.
67-vjeçari, i angazhuar në të shkuarën për të drejtat e njeriut dhe çështje tjera të ndjeshme politike, është shpallur fajtor “për provokim të konflikteve” – një akuzë që përdoret shpesh kundër aktivistëve.
Sun mohoi shumë nga akuzat kundër tij në një seancë para gjyqit, duke e përshkruar veten si një “anëtar i shquar i partisë komuniste”. Megjithatë ai thuhet se pranoi se kishte bërë gabime, përfshirë postimin e mesazheve në internet, shkruan BBC.
“Unë zotohem të marr akuzat mbi veten time, edhe nëse janë të rënda, në këmbim të lirimit të të tjerëve. Ne jemi njerëz të cilët kanë dhënë kontribute për shoqërinë,” tha ai.
Akuzat tjera kundër tij janë edhe për pushtim të paligjshëm të tokës bujqësore, si dhe për pengim të punëtorëve qeveritarë që të kryejnë punën e tyre. Kompania e tij Sun, është ndër më të mëdhatë në Kinë, me biznese që variojnë nga përpunimi i mishit dhe ushqimi i kafshëve shtëpiake deri te shkollat dhe spitalet.
