Gruaja e cila u vra dhe u hodh në shkurre, dyshohet se është masakruar nga kunati. Fillimisht Lirie Xhepa është goditur me sende të forta pas koke, hekur ose gurë. Më pas ajo është qëlluar me pistoletë nga një distancë e afërt, duke i shkaktuar vdekjen.
Policia dyshon se kemi të bëjmë me një krim në familje. Lirie Xhepa ka qenë e martuar. Burri i saj ka vdekur prej disa vitesh, dhe dyshohet se kishte lidhje intime me kunatin e saj, vëllain e bashkëshortit. 49-vjeçarja jetonte me njërin nga djemtë e saj, vetëm 300 metra larg vendit ku u hodh trupi i masakruar.
Të shoqëruarit
Fllimisht u përfol për 10 të shoqëruar, e ndërsa burimet ende jo zyrtare thonë se janë 20 persona, pjesa më e madhe të afërm të Lirie Xhepës. Mes të shoqëruarve janë edhe djemtë e 49-vjeçares, si dhe disa të afërm të ish-burrit të saj.
Dyshimet për vrasjen bien mbi kunatin Dashamir Xhepa. Policia thekson se Lirie Xhepa kishte konflikte me Dashamir Xhepën, ndaj po hetohet pista e krimit në familje. Dashamir Xhepa është shpallur në kërkim nga policia. Dëshmitarë në zonë i thanë policisë se kanë parë një makinë të zezë të hedhë diçka në shkurre, dhe më pas ky automjet është larguar me shpejtësi.
