Shkencëtarët në Gjermani kanë zhvilluar një sistem të ri të inteligjencës artificiale, i cili analizon proteinat në një mostër të vetme gjaku te një pacient me sëmundje koronare të zemrës, duke parashikuar në këtë mënyrë shanset e një pacienti për të mbijetuar.
Sistemet e kujdesit shëndetësor në mbarë botën, po luftojnë për të akomoduar një numër të madh pacientësh të sëmurë rëndë me COVID-19, të cilët kanë nevojë për kujdes të veçantë mjekësor, veçanërisht nëse identifikohen si me rrezik të lartë. Vlerësimet e rrezikut të vendosur klinikisht në mjekësinë e kujdesit intensiv, si SOFA ose APACHE II, tregojnë vetëm besueshmëri të kufizuar në parashikimin e rezultateve të sëmundjes në të ardhmen për COVID-19.
Në studimin e ri, studiuesit studiuan nivelet e 321 proteinave në mostrat e gjakut të marra në 349 pika kohore nga 50 pacientë me sëmundje kritike COVID-19 që trajtoheshin në dy qendra të pavarura të kujdesit shëndetësor në Gjermani dhe Austri.
15 nga pacientët në grup vdiqën; koha mesatare nga pranimi deri në vdekje ishte 28 ditë. Për pacientët që mbijetuan, koha mesatare e shtrimit në spital ishte 63 ditë. Studiuesit gjetën 14 proteina, të cilat me kalimin e kohës, ndryshuan në drejtime të kundërta për pacientët që mbijetojnë në krahasim me pacientët që nuk mbijetojnë në kujdesin intensiv. Ekipi më pas zhvilloi një model të mësimit të makinerive, për të parashikuar mbijetesën bazuar në një matje të vetme në pikën kohore të proteinave përkatëse, dhe testoi modelin në një grup të pavarur prej 24 pacientësh me sëmundje kritike. Modeli demonstroi fuqi të lartë parashikuese në këtë grup, duke parashikuar saktë rezultatin për 18 nga 19 pacientë që mbijetuan dhe 5 pacientë që vdiqën (AUROC = 1.0, P = 0.000047).
Studiuesit arrijnë në përfundimin se testet e proteinave të gjakut, nëse vërtetohen në grupe më të mëdha, mund të jenë të dobishme si në identifikimin e pacientëve me rrezikun më të lartë të vdekshmërisë, ashtu edhe për të testuar nëse një trajtim i caktuar ndryshon trajektoren e parashikuar të një pacienti individual.
Burimi i lajmit: Science Daily. Përshtatur nga Tirana Today
