Zhvillohet në Tiranë “Forumi Rajonal për Politikat Bujqësore” i cili këtë vit ka temën kryesore të diskutimeve; kapërcimin e sfidave globale të cilat prekin vendet e Ballkanit Perëndimor. Studiues të politikave ushqimore, profesorë të universiteteve të rajonit dhe politikbërës të vendeve të Ballkanit Perëndimor do të diskutojnë në Tiranë përgjatë dy ditëve, duke dalë në përfundim me disa propozime për shtetet e rajonit.
Shqipëria mban presidencën e grupit të përhershëm të punës për zhvillimin rural rajonal përmes Ministrisë së Bujqësisë dhe Zhvillimit Rural. Ministrja Frida Krifca ka mbajtur fjalën hapëse të punimeve, duke kërkuar rekomandime konkrete nga ky forum, lidhur me politikat publike ushqimore që vendet e rajonit duhet të ndërmarrin.
“Ky vit i vështirë, na rikonfirmoi se bashkëpunimi rajonal, nuk është më një opsion për vendet tona, por domosdoshmëri për tu përballur me kushtet e vështira të tregjeve botërore”, tha ministrja Krifca në fjalën e saj.
Ajo solli gjithashtu në vëmendje të forumit edhe rastin e sukseshëm të iniciativës Open Balkan, e cila shërbeu si zgjidhje për të mbajtur hapur tregjet dhe lehtësuar tregtinë mes vendeve të rajonit.
Objektivi kryesor i këtij forumi është rritja e nivelit të prodhimit të produkteve bujqësore, në kushtet e ruajtjes së qendrueshmërisë ekonomike, sociale dhe mjedisore.
