Yaya Toure është një lojtar i lirë dhe pritet që shumë shpejt të finalizojë marrëveshjen me një skuadër. Ditën e sotme u fol se ai ka kaluar me sukses testet mjekësore në Londër, por asnjëherë nuk u bë i ditur ekipi me të cilin ishte duke negociuar. Lajmi është bërë i ditur nga agjenti i tij, Dimitry Seluk.
Hipotezat e para ishin se Toure do ti bashkohej West Hamit, aty ku do të gjente edhe ish-trajnerin Manuel Pellegrinin, me të cilin kaloi një formë mjaft të mirë tek Manchester City. Ai pak kohë më parë kishte shprehur dëshirën për të qëndruar në Premier League për tu hakmarrë ndaj Guardiolas dhe kjo e bënte më real kalimin tek londinezët. Por duket se destinacioni i mesfushorit nga Bregu i Fildishtë nuk është në Premier League. Ai do të rikthehet në Superligën greke dhe do të bashkohet me Olimpiakosin, me të cilët në 2005-ën ka fituar Kampionatin dhe Kupën e Greqisë.
Është “Daily Mirror”, ai që hedh disi dritë mbi të ardhmen e lojtari teksa shkruhet se lojtari tashmë ka bërë një hap të mirë drejt marrëveshjes në Greqi. Mësohet se te klubi i ri Toure do të përfitojë rreth 2 milionë euro në vit.
