Drejtori i Përgjithshëm i Policisë së Shtetit Ardi Veliu pati një takim me strukturat e Drejtorisë Vendore të Policisë Shkodër. Vizita vjen një ditë pas operacionit ku u arrestuan të dyshuarit si autorë të atentatit të 13 janarit ku mbeti i plagosur rëndë Lulzim Kulla dhe 7 persona të tjerë.
Drejtori Vendor i Policisë Gjovalin Loka, gjatë takimit u shpreh se: “Qindra telefonata mbështetje dhe falënderimi në 24 orët e fundit nga qytetarët për zbardhjen e ngjarjes. Punuam në grup në bashkëpunim të fuqishëm me Prokurorinë”.
Ndërsa nga ana tjetër gjatë fjalës së tij, Veliu u shpreh se: “Vlerësim për 2 goditjet e fundit në kuadër të operacionit “Forca e Ligjit”. Vlerësim për Drejtuesit dhe ekipin për zbardhjen e ngjarjes me eksploziv. Inkurajim për punën e policisë dhe mbështetje për rezultate të tjera
Inkurajim dhe vlerësim për bashkëpunimin e Prokurorisë së Shkodrës me Policinë, model që duhet shpërndarë dhe krijuar në çdo qark. Drejtori i Përgjithshëm i Policisë Veliu zhvilloi edhe një takim me Prokurorin e Rrethit Shkodër Anton Martini.
Martini ka vlerësuar bashkëpunimin me policinë vendore dhe punën profesionale të bërë bashkërisht për zbardhjen e ngjarjes.
Drejtori Ardi Veliu falënderoi Prokurorin për ndihmën dhe mbështetjen si dhe theksoi se puna jonë ka sukses kur punojmë bashkërisht”.
