Qendra Kombëtare për Personat me Aftësi të Kufizuar ka shtatë vite që është inaguruar, por qeveria e ka braktisur duke mos investuar asgjë. Ardian Hysa, Kryetar i Shoqatës së të Verbërve, ka bërë thirrje ndaj qeverisë që të kthejë sytë nga personat me aftësitë të kufizuar dhe të mbështesë inegrimin e tyre. Sipas tij, që prej inaugurimit në vitin 2014, qendra e vetme kombëtare e personave me aftësi të kufizuar në Vaqarr qëndron e mbyllur pasi qeveria ka zgjedhur të mos financojë shërbimet e qendrës edhe pse është bashkëfinancuese në ndërtimin e kësaj qendre.
Lënia pas dore ka futur në vështirësi këtë shtresë, ndërkohë që rrezikon të nxjerrë jashtë funksionit edhe infrastrukturën 4 katëshe të godinës. Aktualisht qendra në Vaqarr numëron 23 klasa dhe laboratorë të dedikuar me shërbime komplekse, rehabilitim fizik, terapi të kombinuara, mësimdhënie të gjuhës brail, dhe gjuhës angleze, klasa për fëmijët autik dhe me probleme në të folur dhe dëgjim, si dhe shërbime të specializuara për grupe të tjera të aftësisë së kufizuar. Ndërkohë, për personat me aftësitë të kufizuar nga rrethet, qendra ofron edhe shërbim hotelerie me 120 shtretër, një mensë për 250 persona si dhe një minfushë futbolli, e cila është aktualisht e papërdorshme për mungesë kujdesi dhe investimi.
Por, sipas Hysës, këto ambiente po degradojnë nga mungesa e investimit dhe mirëmbajtjes. Në vend të investimeve nga Qeveria Shqiptare, ka qenëzyra e Kooperacionit Italian për Zhvillim që ka mbështetur takimin e sotëm në godinën e qednrës në Vaqarr, duke bërë të mundur edhe praninë e ambasadorit spanjoll në Tiranë, përfaqësues të ambasadës italiane si dhe kreun e Kooperacionit Italian, i cili premtoi ndihma për vijimin e projekteve rehabilituese.
Në Shqipëri numërohen mbi 12 mijë të verbër, që kanë nevojë për mbështetje për të bërë të mundur integrimin e tyre në jetën e përditshme dhe në gjetjen e rrugëve për të përmirësuar aftësi të dnryshme që të ndjehen të dobishëm për veten dhe për të tjerët. Deri në vitin 2014 nga Qeveria lëvroheshin mbi 40 milionë lekë të reja çdo vit, por që në kohën në drejtimit të Ministrisë së Çështjeve Sociale nga Erion Veliaj, kjo ndihmë u bllokua.
Hysa e konsideroi si një hap të mirë praninë e zv/ Ministres së Kulturës dhe Drejtoreshën për Politikat ndaj Personave me Aftësi të Kufizuara në Ministrinë e Shëndetësisë dhe Mbrojtjes Sociale, duke u kërkuar atyre të jenë zëri i kërkesave të kësaj shtrese, e cila vijojn të hasë vështirësi të mëdha në integrimin shoqëror.
