Kreu i Organizatës Botërore të Shëndetësisë (OBSH), Tedros Adhanom Gebregesous tha se Kina duhet të bashkëpunojë më tepër në hetimin për origjinën e pandemisë Covid-19. Rastet e para me këtë virus u regjistruan në qytetin kinez të Wuhanit në dhjetor të vitit 2019.
“Shpresojmë se do të ketë një bashkëpunim më të mirë për të arritur në fund të asaj që ndodhi,” tha Tedros Adhanom Ghebreyesus në një konferencë për shtyp në Gjenevë, duke bërë thirrje në veçanti për aksesin në të dhëna të papërpunuara, të cilat deri më tani kanë qenë joadekuate, shkruan Live Mint.
Tedros tha se hetimet mbi origjinën e pandemisë në Kinë po vështirësoheshin nga mungesa e të dhënave në ditët e para të përhapjes së saj atje.
“Ne i kërkojmë Kinës që të jetë transparente dhe e hapur dhe të bashkëpunojë. Ne ua kemi borxh miliona njerëzve që vuajtën dhe milionave që vdiqën të dinë se çfarë ndodhi,” shtoi ai.
Ndërkohë, Ministri gjerman i Shëndetësisë Jens Spahn, i bëri thirrje Kinës që të bëjë të mundur që hetimet për origjinën e pandemisë COVID-19 të vazhdojnë, duke thënë se duheshin më shumë informacione.
