Kryetari i komunës së Mitrovicës, Agim Bahtiri, zhvilloi sot një takim me kreun e PD-së Lulzim Basha. Në një prononcim të shkurtër për mediat, Bahtiri tha Basha ishte nip në Kosovë, dhe se kontributi i tij pas luftës ishte i paharrueshëm, duke e bërë të meritonte edhe postin e qytetarit të nderit. Ai shtoi më tej se Basha nuk kishte lidhje me akuzat me të cilat është përballur ditën e fundit, për zhdukjen e kasetës së masakrës së Krushës.
“Kam ardhur që të takoj mikun tim, dhe qytetarin tim se për punën që ka bërë për Kosovën e kam shpallur qytetar nderi dhe kam ardhur ta përkrah për sfidat që po kalojnë dy vendet. U bëj apel të gjithë krerëve të partive politike, që të bashkohemi si një trup, se kemi një tragjedi në Kosovë, jemi në situatë tejet të keqe dhe të brengosur se UÇK po trajtohet në Hagë padrejtësisht. Prandaj shpifjet më të ulëta që i bëjnë dikush me qëllime të caktuara, nuk i takojnë Bashës, prandaj jemi këtu që të mbrohemi deri në fund në emër të qytetarëve të Mitrovisës dhe Kosovës. Se e kemi nip dhe ka dhënë një kontribut të veçantë për Kosovën dhe e falenderoj, dhe i uroj për punën e tij të palodhshme, kontributet e tij nuk harrohen në Kosovë dhe shpifjet ndaj tij të disa njerëzve që nuk dua ta përmend emrin, janë të ulëta dhe janë të shpifura”, tha Bahtiri.
