Mandati i Eduard Halimit i kalon Astrit Veliajt. Kështu ka vendosur sot Komisioni Qendror i Zgjedhjeve, teksa ka votuar me 7 vota pro dhënien e mandatit të deputetit Astrit Veliajt për Qarkun e Beratit.
Dy zonjat në listën e PD-së, që u takonte mandati në radhë në bazë të parimit për kuotat gjinore, dhanë dorëheqjen me një letër dërguar institucionit.
Kështu, mandati i kaloi Astrit Veliajt, i cili renditej i dyti në listën e PD-së për zgjedhjet parlamentare të 25 qershorit 2017.
“KQZ i dha mandatin e deputetit të Kuvendit të Shqipërisë kandidatit të listës shumemërore të Partisë Demokratike në qarkun Berat, për plotësimin e vakancës së njoftuar nga Kuvendi i Shqipërisë”, njoftoi KQZ.
RENDI I DITES NE MBLEDHJEN E KQZ
Komisioni Qendror i Zgjedhjeve, ditën e hënë, më datë 19.02.2018, ora 10:00, zhvillon mbledhjen me këtë rend dite:
Shqyrtimi i projekt vendimeve:
- Për dhënien e mandatit të deputetit të Kuvendit të Shqipërisë kandidatit të listës shumemërore të Partisë Demokratike në qarkun Berat, për plotësimin e vakancës së njoftuar nga Kuvendi i Shqipërisë.
- Për verifikimin e deklarimeve në formularin e vetëdeklarimit të kandidatëve nga listat shumemërore për këshillat bashkiak në zbatim të ligjit nr.138/2015 ”Për garantimin e integritetit të personave që zg jidhen, emërohen ose ushtrojnë funksione publike”.
- Për miratimin e Raportit Vjetor të KQZ-së për vitin 2017, që do t’i paraqitet Kuvendit të Shqipërisë.
- Për miratimin e strukturës së shpenzimeve buxhetore të KQZ-së për vitin 2018.
