Kur i kanë mbetur edhe pak ditë si deputet, Kostaq Papa nuk ikën pa marrë atë që i takon, sipas tij, një shtëpi që pretendon se ia ka marrë shteti. Deputeti Kostaq Papa kërkon t’i kthehet një shtëpi, të cilën pretendon se ia ka marrë shteti 50 vite më parë. Në fjalën e marrë në Kuvend, ai vendosi pikat mbi ‘i’, duke nënvizuar se kërkon të drejtën që i takon.
“ILDKP është një institucion i rëndësishëm, dhe ne i përgjigjemi sa herë na kërkon pasuritë. Unë i listova pasuritë e mia, por njëra prej tyre edhe pse është e listuar nuk ekziston. Shteti ka ende pasuri që ia ka marrë qytetarëve në mënyrë të paligjshme.
Kështu edhe mua para 50 vitesh kur unë isha i vogël shteti më mori rininë, fëmijërinë më mori dhe shtëpinë. Dhe ende nuk ma ka kthyer.
Dhe unë iu drejtova kryeparlamentarit. Ai tha se do më ndihmonte. Për dijeni dhe kryeministrit. Takova dhe drejtues të pushtetit lokal të kryeqytetit të Tiranës, ku unë jam si deputet për ta mbyllur këtë gjë sipas të drejtës që më takon.
Qoftë edhe pas 50 vitesh. Dhe pse shteti nuk më kthen dot fëmijërinë, por të paktën të më kthejë shtëpinë. Unë i kam listuar pasuritë e mia aty. Por shteti më mban akoma. Kur shteti vepron me ne kështu, mendoni si vepron me qytetarët e thjeshtë”, u shpreh Papa.
