Edhe pas formimit të qeverisë, në Kosovë palët politike vijojnë të kenë tensione mes tyre.
Madje, deputetë të Lidhjes Demokratike të Kosovës po synojnë që të rrëzojnë qeverinë “Haradinaj” nëpërmjet mocionit të mosbesimit, njësoj siç u rrëzua muaj më parë Isa Mustafa.
Para pak ditësh, nënkryetari i LDK-së, Lutfi Haziri deklaroi se mocioni i mosbesimit ndaj qeverisë do të ndodhë shumë shpejt, madje ai tha se kjo iniciativë është cështje ditësh.
Edhe deputetja e LDK-së, Besa Gaxherri u shpreh se kjo qeveri nuk do të ketë “jetë” të gjatë, duke marrë parasysh numrin prej 61 votave në Kuvend.
Gaxherri tha se para se të vijë në rend dite mocioni i mosbesimit, po bëhen disa analiza që të shikohet momenti më i përshtatshëm për rrëzimin e qeverisë.
“Ne jemi aty, sigurisht që do t’i vijë radha edhe mocionit, por para se të bëhet mocioni bëhen disa analiza, disa biseda. Kështu që, deri ta shohim momentin se cili është më i volitshmi dhe në atë moment që ne i kemi numrat për ta bërë, do ta bëjmë. Aty jemi sa më shpejt që këtë qeveri ta rrëzojmë”, ka thënë ajo.
