Kandidati për kryeministër për Kosovën, nga koalicioni LDK-AKR, Alternativa dhe Lëvizja për Drejtësi, Avdullah Hoti, i bëri thirrje KQZ-së të jetë më efikase në përmbylljen e procesit zgjedhor, në mënyrë që të hapet rruga për krijimin e institucioneve.
Në një deklaratë të publikuar në faqen e tij në FB, ai kërkon nga gjithë spektri politik që të respektojë një etikë minimale të komunikimit, duke lënë anash konspiracionet dhe etiketimet. “Të gjithë duhet t’i respektojmë ato norma. LDK dhe partnerët e koalicionit do t’i respektojnë, siç kanë bërë gjithmonë”, thotë ai.
Sa i përket mundësisë për të qenë në krye të qeverisë së re, Hoti sqaron: “Ne nuk do të krijojmë asnjë bllokadë në krijimin e institucioneve të vendit. Do të respektojmë të drejtën e grupit më të madh parlamentar PAN me te cilin nuk hymë ne koalicion, që për qartësim nuk është fitues i zgjedhjeve por vetëm grupi më i madh parlamentar, të provojë formimin e Qeverisë”.
Nëse nuk kanë sukses, koalicioni ynë do të shfrytëzojë të drejtën kushtetuese për t’i ofruar vendit një qeveri pro-evropiane dhe profesionale, që do të zbatojë programin që ju kemi ofruar qytetarëve të vendit gjatë fushatës zgjedhore,” shkruan Hoti.
