Nis zhvillimi i zgjedhjeve në Kosovë! Sot zhvillohet balotazhi për 19 komuna në Kosovë, ku do të garojnë 38 kandidatë për kryetarë.
Gara më e fortë është në kryeqytet, ku përballë janë kreu aktual i Komunës nga VV Shpend Ahmeti dhe Alban Abrashi i LDK-së.
Të drejtën për të votuar sot në Kosovë e kanë 1 milion e 353 mijë e 613 votues, ndërsa janë hapur 614 qendra me 1.777 vendvotime.
Qendra më e madhe në Prishtinë, salla 1 Tetori, tashmë është hapur dhe qytetarët kanë nisur të votojnë, ndërsa sipas KQZ-së mësohet se në këtë qendër votojnë rreth 4992 votues.
Menaxheri i kësaj qendre, Avdurrahman Brahimi tha për Klan Kosova, se stafi i komisionerëve dhe vëzhguesve është i kompletuar dhe i gjithë materiali ka arritur me kohë.
Megjithatë, presidenti i Kosovës, Hashim Thaçi nuk do të mund të votojë. Kjo për shkak se ai ndodhet në Kanada. Thaçi ka përgëzuar partitë politike dhe kandidatët për fushatën e dinjitetshme elektorale me anë të një postimi në Facebook, si dhe shoqërinë civile dhe mediat për angazhimin dhe raportimin korrekt.
Lidhja Demokratike e Kosovës (LDK) garon në 12 komuna, Partia Demokratike e Kosovës (PDK) në 9 komuna, Lëvizja Vetëvendosje në 6 komuna, Aleanca për Ardhmërinë e Kosovës (AAK) në 5 komuna, Aleanca Kosova e Re në një komunë, Nisma në një komunë dhe Alternativa në një komunë.
Partitë politike fazën nga raundi i parë i zgjedhjeve me 22 tetor e shfrytëzuan për të bërë koalicione në nivel lokal nga më të ndryshme. Gara më e fortë për kryetar komunash, parashihet të jetë në qendrat e mëdha, që janë, Prishtina, Prizreni, Gjakova, Ferizaj, Gjilani dhe Mitrovica. Në Prishtinë për kryetar komune, garojnë (LDK-VV), në Prizren, (PDK-VV), në Ferizaj, (PDK-LDK), në Mitrovicë, (PDK-AKR), në Gjilan, (LDK-VV) dhe në Gjakovë (AAK-Alternativën).
