Qeveria e Kosovës, që është akoma në detyrë deri në formimin e qeverisë së re, ka shpërndarë për mediet një komunikatë në të cilën thuhet se Republika e Kosovës është afër pranimit në INTERPOL.
“Përmes një letre dërguar ministrit të Punëve të Brendshme, Skender Hyseni, Sekretari i Përgjithshëm i INTERPOL-it, Jurgen Stock, e ka informuar se Komiteti Ekzekutiv i INTERPOL-it, ka vendosur që aplikimin e Republikës së Kosovës për anëtarësim në INTERPOL, ta vënë në agjendën e Asamblesë së Përgjithshme që do të zhvillohet në Pekin të Kinës, nga data 26 deri më 29 shtator 2017”, thuhet në komunikatë.
Anëtarësimi i Kosovës në INTERPOL, do të përparonte shumë kapacitetet e saj në luftë kundër shkelësve të ligjit dhe krimeve. Gjithashtu, anëtarsimi në INTERPOL do të fuqizonte shtetin e Kosovës në arenën ndërkombëtare.
“Ministria e Punëve të Brendshme, gjatë dy vjet e gjysmë të mandatit të saj, me përkrahjen substanciale të Kryeministrit Isa Mustafa, ka punuar me përkushtim të madh në avancimin e kapaciteteve të saj si dhe në bashkëpunim me dikasteret e tjera qeveritare kanë lobuar fuqishëm për anëtarësimin e Kosovës në INTERPOL, punë e cila pritet të rezultojë me pranimin e Kosovës gjatë muajit shtator”, thuhet në komunikatën e qeverisë.
INTERPOLI-i është organizata më e madhe e policisë në botë.
