Të dhënat e fundit rreth rasteve në Kosovë me të prekurit nga Covid-19 që shkaktohet nga koronavirusi i ri, nuk mund të gjenden fare apo mund të hasen vetëm si të dhëna jo të plota, nëpër ueb-faqet ku prezantohen statistikat botërore të pandemisë.
Republika e Kosovës nuk është anëtare e Organizatës së Kombeve të Bashkuara dhe rrjedhimisht as e Organizatës Botërore të Shëndetësisë (OBSH), andaj edhe këtu shihet problemi i mungesës së komunikimit të këtyre të dhënave me pjesën tjetër të botës.
Lul Raka, mikrobiolog, i tha “Radios Evropa e Lirë”, se në linqet e OBSH-së mund të informohesh për sëmundjen COVID-19 për gjitha vendet, përpos Kosovës.
“Organizata Botërore e Shëndetësisë nuk e njeh Kosovën. Andaj ne nuk mund të raportojmë. Ky është realiteti. Së fundmi i kemi raportuar ECDC-së (Qendra Evropiane për Parandalimin dhe Kontrollin e Sëmundjeve)”, ka thënë Raka. /Rel
