Policia e Kosovës nuk ka ndaluar në kufi ditën e sotme ekipin serb të volejbollit , O.K. Kosovska Mitrovica nga Loznica. Ekipi serb kishte një ndeshje në Ligën e Parë të Volejbollit të Serbisë, e cila do të zhvillohej në Mitrovicë.
Ministri i Kulturës, Rinisë dhe Sportit, Kujtim Gashi, ka konfirmuar se një ekip volejbolli serb është ndaluar në pikën kufitare të Jarinjës për shkak se nuk kanë marrë leje nga Federata e Volejbollit të Kosovës për të zhvilluar ndeshjen. Ai u shpreh se tani e tutje skuadrat serbe nuk do të mund të futen në Kosovë pa marrë leje paraprakisht nga Federata.
“Organizimin e ndeshjeve e bëjnë vetëm federatat tona, këtë organizim e bën vetëm Federata e Volejbollit të Kosovës. Ky është rasti i parë që po ndalohen sportistë, por nuk do të lejohen të hyjnë më në shtetin tonë pa pëlqimin e federatave tona”, tha Kujtim Gashi për Gazetën Express.
Ministria e Kulturës shtoi se është e interesuar që çdo aktivitet të organizohet vetëm sipas procedurave të shtetit dhe në menaxhim të federatave vendore. “Ekipi serb do të luaj me një klub serb, nuk e lejojmë këtë, ky klub nuk është i regjistruar në federatat tona dhe nuk i lejojmë më të vijnë”, sqaroi Ministri.
Ai tha se për këtë vendim është njoftuar Policia e Kosovës, Dogana dhe Ministria e Punëve të Brendshme. “Jemi të interesuar të ketë organizim të garave vetëm nga federatave tona”, përfundoi Ministri.
Ndërkohë, mediat serbe raportuan se lojtarët e volejbollit të ekipit O.K. Kosovska Mitrovica nga Loznica, u ndalën në pikën kufitare të Jarinjës. Ata sot do të luanin ndeshjen e raundit të 10 të Ligës së Parë të Volejbollit të Serbisë, në qytetin e Mitrovicës.
Trajneri dhe lojtari i ekipit O.K. Kosovska, Nikola Radomirović, tha për Radio Contact Plus se rreth orës 12, lojtarët nga Loznica janë ndalur në pikën kufitare në Jarinjë dhe se nuk u lejuan të hyjnë në Kosovë.
