Kryeministri Rama zbuloi disa mesazhe që i ka dhënë presidentit Vuçiç gjatë konferencës për shtyp të mbajtur sot me kryeministrin e Kosovës, Haradinajn.
Gjatë fjalës së tij, Rama tha se ishte shprehur para Vuçiç se e kishte të pamundur të kuptonte logjikën e refuzimit serb për anëtarësimin e Kosovës në UNESCO, ndërsa shtoi se është Serbia ajo që del më e humbur nga kjo çështje se vetë Kosova.
“Unë ia kam thënë presidentit Vucic që e kam të pamundur ta kuptoj logjikën e refuzimit serb për anëtarësimin e Kosovës në UNESCO, sepse nëse për serbët ka një rëndësi të posaçme trashëgimia e tyre kulturore, monumentet e tyre në Kosovë, atëherë ata duhet të ishin të parët që të vraponin për ta mbrojtur përmes UNESCO-s në një vend që pa dashjen e tyre qeverisin shqiptarët dhe është krijuar një shtet sovran dhe i pavarur.
Kush humbet në këtë rast nga ky proces? Kosova humbet më pak se Serbia në këndvështrimin tim, se UNESCO dihet se për çfarë duhet, i duhet Serbisë që të jetë në Kosovë për të mbrojtur atë që ata e quajnë trashëgimi e tyre kulturore. Unë e kam ndarë shqetësimin me Vucicin, qe e ndjek ne kohe reale jetën politike në Shqipëri dhe Kosove dhe besoj se do japë përgjigje në orët që vijojnë, nëse nuk e jep do isha i inkurajuar se po reflekton”, tha Rama.
