Ministria e Drejtësisë e Kosovës njoftoi se autoritetet e Kosovës kanë ekstraduar në Mal të Zi Mario Milloshevicin, i kërkuar nga autoritetet malazeze si i dyshuar për vrasje të rëndë.
Ministri në largim i Drejtësisë Abelard Tahiri, tha se ekstradimi i “një prej personave më të kërkuar në Mal të Zi” është kryer me sukses të martën, më 5 nëntor.
Siç raporton Shërbimi i Ballkanit i Radios Evropa e Lirë, emri i Milloshevicit lidhet me një nga grupet e organizuara kriminale në Mal të Zi, përgjegjës për likuidime të shumta.
Milloshevic thuhet se ka qenë edhe anëtar i grupit kriminal që ka kryer sulm të armatosur kundër gazetares së të përditshmes “Vijesti”, Olivera Llakic.
Në komunikatën e Ministrisë së Drejtësisë në Kosovë thuhet se nga shtatori i vitit 2017-të deri në nëntor të këtij viti, Kosova ka ekstraduar 165 persona.
