Përtej orarit kufizues, në Kosovë pritet që të shtrëngohen masat. Në kohën kur u vendos orari kufizues, shumë qytetarë nga Kosova udhëtuan drejt Shqipërisë gjatë fundjavës. Kurba e të infektuarve është gjithmonë e më shumë në rritje, ndaj nga sot pritet të vendosen masa të reja kufizuese.
Kryetari i Komunës së Mitrovicës, Agim Bahtiri, në një deklaratë të dhënë për Telegrafin, ka thënë se në takim me ministrin e Shëndetësisë, Armend Zemaj, është propozuar që komunat të ndahen në tri grupe, varësisht numrit të personave të infektuar.
Në grupin e gjelbër do të hyjnë komunat që brenda javës kanë deri në 75 raste, në grupin e verdhë do të hyjnë komunat që kanë nga 76 deri 149, kurse në grupin e kuq do të hyjnë komunat që brenda javës kanë më shumë se 150 raste.
“Lakorja e rasteve të fundit na detyrojnë për kujdes të shtuar dhe aktiv. Kërkohet bashkëpunim i ngushtë me komunat e Kosovës, me theks me kryetarët dhe Shtabet Komunale Emergjente, dhe po ashtu bashkëpunim i të gjithë mekanizmave të institucioneve qendrore dhe lokale për zbatim rigoroz të masave të dala nga niveli qendror, është i domosdoshëm”, është shprehur Agim Bahtiri.
