Tetë autobusë që udhëtonin nga Shqipëria nëpërmjet Kosovës, iu është ndaluar kalimi në pikën kufitare të Morinës. Ata qëndruan të bllokuar prej disa orësh, dhe shkak është bërë urdhri i lëshuar nga ministria e Transporteve.
Ndërkohë, ministri Pal Lekaj, në një prononcim për “Gazetën Express” ka deklaruar se një nga arsyet pse ndodhi ky incident është keqpërdorimi i lejes nga operatorët e Shqipërisë, ndërsa shtoi se pezullimi do të vazhdojë deri në takimin e komisioneve teknike nga të dyja shtetet.
“Operatorët nga Shqipëria kanë poseduar leje nga Ministria e Infrastrukturës dhe Transportit, për kalim nëpër territorin e Kosovës vetëm tranzit. Por kjo leje është keqpërdorur në vazhdimësi, autobusët kanë ndaluar edhe nëpër stacionet e Kosovës për të marrë udhëtarë, prandaj departamenti përkatës në MIT, ka pezulluar këtë leje. Pezullimi do të vazhdojë deri në takim të komisioneve teknike nga të dyja shtetet, për shqyrtim”, u shpreh Lekaj.
