Kreu i Urgjencës Kombëtare, Skënder Brataj deklaroi se varianti indian i koronavirusit, Delta pritet që të mbizotërojë të gjithë botën, dhe se ky mutacion, ka edhe 3 variante të tjera. Deklarata e Bratajt u bë ditën e sotme në A2 CNN.
Megjithatë, sipas Bratajt, ky variant nuk ka një agresivitet të lartë, pasi ata persona që janë vaksinuar dhe më pas janë infektuar me këtë mutacion, nuk kanë përfunduar në spital.
Ndër të tjera, Brataj përmendi edhe disa nga simptomat e variantit Delta.
Skënder Brataj: ”Ky variant do të mbizotërojë me të gjitha mutacionet. Delta ka edhe 3 variante. Për fat të mirë, ky variant nuk po tregon një agresivitet më të lartë, përkundrazi po tregon se ata që kanë kryer vaksinën nuk po përfundojnë në spital. Periudha e inkubacionit është 2-3 ditë më e vogël se varianti i mëparshëm. Brataj përmend edhe simptomat e variantit Delta. Ky variant ka më tipike rrufën, që paraqitet me sekrecione nga hundët, dhimbje fyti, dhimbje koke, por edhe me të vjella dhe diarre. Numri i pacientëve në spital na bën të jemi të qetë”.
Me hyrjen e variantit Delta në vend, autoritetet shëndetësore apelojnë qytetarët për respektimin e masave të distancimit fizik, vendosjen e maskave në ambientet e brendshme dhe higjenën, të cilat janë thelbësore për kufizimin e përhapjes së virusit.
