Koronavirusi ka bërë që vendet e Evropës dhe jo vetëm të mbyllin kufijtë dhe të izolohen.
Por duket se ky nuk është rasti me Suedinë, e cila nuk ka mbyllur as kufijtë, as shkollat apo baret, madje nuk ka ndaluar as grumbullimet me më pak se 500 njerëz.
Ndryshe nga vendet tjera që po përjetojnë një krizë shëndetësore, situata në Suedi duket ende e qetë. Qeveria atje ka thënë se populli suedez e do natyrën dhe mbyllja ne karantinë do të shkaktonte dëme të theksuara të shëndetit mendor.
Revista amerikane Bloomberg raporton se “Metoda suedeze e Laissez-Faire është një nga reagimet më të kontestuara ndaj koronavirusit.”
Por ndoshta Suedia nuk e bën këtë prej zellit libertarian por prej traditës së dëgjimit të ekspertëve dhe autoriteteve shëndetësore, të cilët besojnë se është më mirë gjurmimi i rasteve individuale dhe jo mbyllja e gjithçkaje.
Banka botërore llogarit se 80 deri 90 përqind e dëmit ekonomik të epidemive zakonisht vjen nga sjelljet antagoniste dhe jo nga sëmundja, vdekjet apo rënia e prodhimit.
