Shkencëtarët e Institutit Meteorologjik Royal Hollandez (KNMI), kanë monitoruar nivelet e ndotjes së ajrit në Europë për muajt e fundit, duke përdorur të dhëna satelitore. Imazhet satelitore dëshmojnë përmirësim të cilësisë së ajrit në Europë, pasi popullsia është izoluar, për të parandaluar përhapjen e koronavirusit.
Studimi në fjalë është përqëndruar në të dhënat nga qytetet kryesore në Itali, Spanjë dhe Francë, duke krahasuar nivelet në mars dhe prill 2020 me të njëjtën periudhë në 2019.
Madridi, Milano dhe Roma kanë një rënie prej 47 deri në 49 përqind të dioksidit të azotit. Ndryshimi më dramatik është në Paris, ku shihet një rënie prej 54 përqind. Studiuesit sqarojnë se këto ndryshime në nivelet e ndotjes së ajrit, përkojnë me marrjen e masave të rrepta për të ngadalësuar përhapjen e pandemisë vdekjeprurëse të koronavirusit.
Dioksidi i azotit është një kimik i prodhuar nga termocentralet, automjetet dhe aktiviteti industrial. Ai është i dëmshëm për shëndetin e njeriut, veçanërisht për rrugët e frymëmarrjes.
Koronavirusi mbetet një kërcënim për globin. Çdo ditë rritet numri i viktimave, dhe deri më tani në të gjithë botën kanë humbur jetën 146.872 persona dhe rezultojnë të infektuar 2.183.877 të tjerë. Ndërkohë, betejën me COVID-19 e kanë fituar 552.771 qytetarë.
Vendi më i prekur në botë është Amerika. Në Shtetet e Bashkuara të Amerikës kanë humbur jetën 34.641 persona dhe janë prekur nga COVID-19; 678.210 qytetarë. Por virusi është ‘rizgjuar’ në Kinë. Gjatë 24 orëve të fundit në këtë shtet janë konfirmuar 351 raste të reja, dhe kanë humbur jetën 1.290 persona. Numri total i viktimave në Kinë ka shkuar në 4.632.
