Situata nga koronavirusi në Greqi po përkeqësohet dita ditës, teksa numri i viktimave ka shkuar në 17.
Pacienti i fundit që ndërroi jetë ishte një burrë 78-vjeçar. Numri i të infektuarve në shtetin fqinj ka shkuar në 624.
Shumica e personave të prekur rezultojnë të jenë nga Athina. Në spital ndodhen 124 pacientë të shtruar, 34 prej të cilëve janë intubuar.
Pacientët e shtruar në spital vuajnë edhe nga sëmundje të tjera. Mosha mesatare e tyre llogaritet nga 64 deri në 67 vjeç.
Deri më tani vetëm 19 persona kanë arritur të shërohen nga koronavirusi në shtetin fqinj.
Përhapja e shpejtë e koronavirusit në shtetin fqinj, ka bërë që vendi të marrë masa të rrepta për kufizimin e lëvizjeve.
Policia ndodhet në pikat kyçe të qytetit, për të verifikuar nëse respektohet lëvizja e kufizuar, që u vendos që prej orës 6 të mëngjesit të së hënës.
Mediat greke bëjnë me dije se shkelësit e këtyre masave do dënohen me 150 euro gjobë.
