Pyetja që bëjnë mësë shumti shqiptarët gjatë ditëve të fundit, është se a do zhduket virusi me rritjen e temperaturave. Një përgjigje është dhënë nga Andi Koraqi, i cili është anëtar i Komitetit Teknik të Ekspertëve.
Në një intervistë për “Report Tv”, Koraqi ka sqaruar se stina e verës ul transmetueshmërinë e këtij virusi, por jo agresivitetin e tij.
Kjo do të thotë se nga një i prekur infektohen më pak persona, ndryshe sa ka ndodhur në pikun e COVID-it.
Ai tha se në bazë të disa studimeve, virusi inaktivizohet në 56 gradë, të tjerët në 30 gradë. Por asnjëherë nuk mund të flitet me siguri, pasi mjekët ende nuk e dinë se si sillet virusi në temperatura të larta.
“Stina e ngrohtë në të gjithë virozat respiratore ndikojnë, se vijnë gjithmonë në mot të ftohtë, vjeshtë-dimër dhe në fillim pranvere.
Stina e ngrohtë ndikon se ul transmetueshmërinë, jo agresivitetin e virusit. Ka teori të ndryshme, nuk e dimë si sillet fiks virusi në temperatura të larta.
Ka studime që thotë se virusi inaktivizohet në 56 gradë, të tjerët në 30 gradë, e vështirë për ta përcaktuar. Por ka evidenca që edhe në vendet e ngrohta ka pasur raste”, tha Koraqi.
