Koronavirusi ka krijuar një situatë emergjence edhe në Mbretërinë e Bashkuar, ku deri më tani janë shënuar gjithsej 1,543 raste infektimi.
Kryeministri Boris Johnson iu ka bërë sot thirrje të gjithë qytetarëve që të ndalojnë të gjitha kontaktet e panevojshme me të tjerët.
Johnson theksoi se koronavirusi tashmë ishte në një fazë të përhapjes së shpejtë në të gjithë vendin, sidomos në Londër.
Sipas tij, kjo situatë e rëndë mund të zgjasë 12 javë, teksa i ka bërë apel qytetarëve që të shmangin restorantet, baret dhe udhëtimet jashtë vendit.
Kryeministri britanik tha se familjet do të duhet të izolohen për 2 javë nëse një person ka shfaqur simptoma.
Vetëm për ditën e sotme në Britani janë shënuar 150 raste të reja, ndërsa deri më tani janë regjistruar 36 viktima nga koronavirusi.
