Në Korçë është djegur një automjet gjatë natës, ngjarja ka ndodhur në lagjen nr.4 të qytetit, në orët e para të mëngjesit.
Mjeti tip furgon ka qenë i parkuar para banesës së pronarit, Leontiv Prethi i cili tha se mjeti përdorej nga dhëndri i tij. Nga të dhënat paraprake dyshohet se zjarri mund të ketë qenë i qëllimshëm.
“Këtë furgon e nget dhëndri im dhe me atë mban familjen. Është hera e dytë që ndodh. Para një muaji ma vodhën tani ma dogjën.
Dyshoj që ka qenë e qëllimshme. Ekspertët na thanë që mund ti jetë hedhur naftë për ta djegur. Nuk e dimë pse policia ta zbardh” deklaroi ai.
Furgoni që u përfshi nga flakët është me targa AA 729 BL me dokumente në pronësi të B.Ll. 32 vjeç, banues në Korçë. Pas njoftimit në vendngjarje shkuan shërbimet e policisë si edhe zjarrfikësja për të bërë të mundur shuarjen e zjarrit.
Nga të dhënat paraprake, sipas policisë rezulton se mjeti ka marrë flakë si pasojë e një vatre zjarri që është konstatuar në brendësi të tij, e qëllimshme, e cila ka shkaktuar edhe djegien e plotë.
