Presidenti rus ka akuzuar kundërshtarët e homologut të tij amerikan Donald Trump se po dëmtojnë SHBA-të duke “shpikur histori” rreth kontakteve me Rusinë. Në konferencën e tij vjetore të lajmeve, Vladimir Putin tha se kontaktet midis ekipit të Trump dhe zyrtarëve rusë para zgjedhjeve të vitit të kaluar ishin normale.
Ai tha se opozita amerikane nuk i trajtoi ata që e zgjodhën presidentin Trump me respekt. Fushata e presidentit Trump është duke u hetuar, pasi dyshohet se ka pasur bashkëpunim me Rusinë.
Agjencitë e inteligjencës amerikane kanë arritur në përfundimin se Moska është përpjekur të ndikojë në zgjedhjet presidenciale në favor të Trump, por Putin i mohon akuzat.
“Është e gjitha e shpikur nga ata që kundërshtojnë Trumpin për ta bërë punën e tij që të duket si e paligjshme”, tha Putin, kur u pyet për hetimin.
Ai shtoi se Trump ishte përgjegjës për disa “arritje mjaft serioze”, por nuk ka qenë në gjendje që të përmirësonte marrëdhëniet me Rusinë. Presidenti rus tha se shpresonte që kjo të ndodhte, duke shtuar se globalisht ka “shumë gjëra që mund të bëjmë më me efektivitet”.
Thirrje për qetësi
Presidenti rus përmendi Korenë e Veriut si një zonë të mundshme bashkëpunimi. Por ai tha se disa veprime të kaluara nga SHBA kishin provokuar Korenë e Veriut në shkelje të marrëveshjeve dhe të gjitha palët duhej të qetësoheshin.
Kërkimet e Koresë së Veriut për teknologjinë e armëve bërthamore ka çuar në sanksione të rënda të udhëhequra nga SHBA kundër regjimit.
Më herët, Putin foli edhe për zgjedhjet presidenciale që do të mbahen vitin e ardhshëm, teksa tha se ai do të kandidojë për mandatin e katërt. TIRANA TODAY
