Ekspertët rekomandojnë konsumimin e të paktën 1 apo 2 vakteve me peshk në javë. Kjo pasi peshku është një nga ushqimet më të mira për funksionet e trurit dhe shëndetin mendor. Acidet yndyrore dhe amino acidet që gjenden tek disa lloje peshqish, përmirësojnë shëndetin mendor dhe funksionet e trurit.
Por sipas një studimi të fundit rezulton se konsumimi i peshkut mund të mbrojë trurin nga efektet e dëmshme të ndotjes së ajrit. Mendohet se yndyrnat Omega-3 që gjenden tek peshku, kanë një efekt mbrojtës për trurin e njeriut. Autori kryesor i studimit Ka Kahe, nga Universiteti Columbia në New York, tha: “Peshku është një burim i shkëlqyeshëm i acideve yndyrore Omega-3 dhe i lehtë për t’u shtuar në dietë. Acidet yndyrore Omega-3 luftojnë inflamacionin dhe mbrojnë strukturën e trurit”.
Konsumimi i peshkut zvogëlon dëmtimin e trurit nga neurotoksinat si plumbi dhe mërkuri. “Gjetjet tona tregojnë se nivele më të larta të acideve yndyrore Omega-3 në gjak mund të ruajnë vëllimin e trurit dhe mund të mbrojnë individët nga efektet e mundshme toksike të ndotjes së ajrit”.
