Konstituohet Këshilli i Qarkut të Shkodrës. Në krye të Këshillit është zgjedhur Hilmi Lakti, i cili u propozua nga Partia Socialiste. Ai u vendos në krye, me 18 vota pro dhe 1 kundër.
Ndërkohë, mbledhja vijon ende, ku pritet të zgjidhet edhe nënkryetari.
Po ashtu, u vu re në këtë mbledhje ishte mungesa e kryetares në detyrë të bashkisë së Shkodrës, Voltana Ademi, ndonëse të ftuar kanë qenë kryetarët e bashkisë së Malsisë së Madhe, të Vaut të Dejsë, Pukës dhe Fushë Arrëzit.
Partia Demokratike dega Shkodër ka reaguar lidhur me vendimin e sotëm, ku thekson se Këshilli i Qarkut është ilegjitim dhe nuk përfaqësojnë interesin e qytetarëve.
Po ashtu, në deklaratë thuhet se kryeministri Edi Rama, Tom Doshi dhe hajdutët e tjerë nuk mund të marrin peng të ardhmen e fëmijëve tanë.
“Këshilli i Qarkut është ilegjitim dhe nuk përfaqësojnë interesin e qytetarëve. Këshilli i Qarkut dhe Këshillat Bshkiak monopartiak, përfaqësojnë vetëm interesat e Edi Ramës, Tom Doshit dhe të ngjashmëve të tyre. Partia Demokratike është në anën e qytetarëve dhe do të përfaqësojë interesin e tyre. Me vendosmëri dhe përkrah qytetarëve, ne do të bëjmë gjithçka dhe me çdo kosto, që pushtuesit e rinj të institucioneve dhe krimi që po uzurpon Shkodrën, të largohet shumë shpejtë dhe institucionet t’i kthehen qytetarëve. Trafikantët, të korruptuarit, hajdutët e pasurisë dhe votave të shqiptarëve do të largohen. Me rivendosjen e rendit kushtetues dhe shtetit të së drejtës në Shqipëri, vendi i tyre do të jetë aty ku e ka çdo kriminel, në burg.
Shkodra dhe Shqipëria shumë shpejtë do të bëhet si gjithë Europa. Edi Rama, Tom Doshi dhe hajdutët e tjerë nuk mund të marrin peng të ardhmen e fëmijëve tanë”, thuhet mes të tjerash në reagimin e PD-së.
