Dje ka ardhur në vendin tonë kongresmeni amerikan Mike Quigley. Vizita e tij ka qenë e karakterit ushtarak, ku është takuar me Ministrin e Mbrojtjes, Niko Peleshi dhe ka inspektuar punimet në Bazën e Kuçovës. Ambasada e SHBA-së njofton se do të investohen 58 milionë dollarë për këtë bazë. SHBA po rrisin dita-ditës mbështetjen ushtarake në Shqipëri. Provat janë se SHBA-ja i ka sytë te Baza e Kuçovës.
Njoftimi
Ambasadorja Kim mirëpriti Kongresmenin e Shteteve të Bashkuara Mike Quigley në Shqipëri këtë javë. Kongresmeni përfaqëson distriktin e 5-të të Illinois dhe në datat 18 dhe 19 gusht ishte në Tiranë, ku u takua me Ambasaroren Kim, Ministrin e Mbrojtjes Niko Peleshi, Shefin e Shtabit Begaj dhe vizitoi bazën ajrore të Kuçovës. Baza e Kuçovës do të marrë një financim prej 58 milionë dollarësh nga NATO, për t’a modernizuar atë tërësisht, në mbështetje të transportit ajror, logjistikës, politikave ajrore dhe trajnimeve të NATO-s.
Kthimi i aeroportit të Kuçovës në të parën bazë ajrore të NATO-s në Ballkanin Përëndimor është një mundësi e modernizimit të tij që prej ndërtimit në vitin 1955. Jo vetëm do të shërbejë si bazë mbështetëse Aleancën e Atlantikut të Veriut me furnizim ajror, mbështetje logjistike, mbështetje për policimin ajror, si dhe trajnime e stërvitje, por njëherazi pas finalizimit të projektit do të jetë edhe si bazë kombëtarë për Forcën Ajrore Shqiptare.
