Megi Fino, vajza e të ndjerit Bashkim Fino, ishte ajo e cila e mori e para fjalën në Kongresin e Partisë Socialiste, me rastin e 30 vjetorit të themelimit të kësaj force politike.
Ajo iu drejtua të pranishmëve, duke thënë se Fino e donte me zemër familjen e tij të dytë, që ishte Partia Socialiste. Ajo ndau edhe një rrëfim sekret me babain e saj, me të cilin konfirmoi edhe anëtarësimin në Partinë Socialiste.
Megi Fino: ”Ai kurrë nuk u nda nga kjo parti e nuk na ndau as ne nga hallet e partisë dhe popullit. Ishte i ri kur mori nga gjirokastritët mandatin për t’u bërë deputet. Nuk ishte e lehtë. Një nga ato gjëra që s’do ja harroj kurrë tim eti, ne u rritëm nga presioni për të qenë shembullor në mësime dhe të mirë në shoqëri. Mbiemri jonë u bë shpejt i njohur. Në 1997 kam qenë 4 vjeçe kur im atë u bë kryetari i qeverisë duke mbajtur mbi supe barrën e frikshme të asaj periudhe të trazuar.
Sot dua t’ju rrëfej një sekret. Kemi pasur vetëm një konflikt. Ai e donte shumë këtë parti saqë ai donte shumë që unë të bëhesah pjesë e kësaj partie. Por ne jetonim shumë me hallet e partisë s në shtëpi, dhe mamit iu duk e paimagjinueshme që shtëpisë t’i shtohej një tjetër person me këto halle. Unë mbylla studimet e juridikut jashtë vendit dhe më pas erdha në Shqipëri. E munda babain në konfliktin tonë të brendshëm. Mendova se e munda babain, por ai me ikjen e tij më solli këtu mes jush, për të mos ikur më kurrë.”
