Kuzhinieri i njohur Indrit Çela u dhunua barbarisht nga dy persona mbrëmjen e së shtunës në zonën e quajtur Ura e Gjolës në Bubq. Në pamjet e shpëndara, shihet momenti kur ai tërhiqet zvarrë, nxirret me dhunë nga makina dhe qëllohet me shufra hekuri dhe gjuhet me shkelma. Sot janë hedhur në dritë detaje të reja nga ngjarja në fjalë.
Burimet bëjnë me dije se konflikti midis vëllezërve Ernest e Donald Luka dhe Çelës ka nisur pesë muaj më parë, për parakalimin e makinës. Kunati i kuzhinierit dhe një person tjetër kanë rrahur fillimisht me mjete të forta dy vëllezërit për shkaqe banale të çastit, ndërsa i pranishëm ka qenë edhe Çela. Sipas policisë, në këtë sherr Çela nuk ka qenë person kyç, por kunati i tij.
Ditën e rrahjes brutale të Çelës, vëllezërit Luka kanë pasur informacion se ai do të lëvizte pasi ka shpërndarë një foto që po zbret në Rinas, ndërsa e kanë pritur dhe e kanë rrahur pranë Urës së Gjolës. Mbetet e paqartë pse dy vëllezërit kanë rrahur Çelën, pasi ai nuk ka qenë autori kryesor i rrahjes së para pesë muajve.
Ernest Luka ka pranuar autorësinë e ngjarjes pas arrestimit, ndërsa ka qenë i rezervuar për detaje të ngjarjes së ndodhur para disa muajve. Nga ana tjetër, në marrjen e parë në pyetje, kuzhinieri Indrit Çela nuk ka pranuar të jetë rrahur, por sipas tij, kishte pësuar aksident.
Indrit Çela ka qenë duke udhëtuar me makinën e tij tip Smart me targa AA 062 LR në momentin që është nxjerrë zvarrë me dhunë.
Indrit Çela është emër i njohur për publikun, i cili ka marrë pjesë në emisionet e gatimit në televizione të ndryshme së bashku me mikun e tij Alfio Rrotani. Emri i Alfio Rrotanit kohët e fundit gjithashtu është përfshirë në një skandal në lidhje me një tender 400 mijë dollarë të dhënë nga Fondi Shqiptar i Zhvillimit.
Çela u bë i njohur për publikun shqiptar me sfidën e gatimit në “Master Chef” ku fitoi dhe vendin e dytë, ndërsa i pari doli miku i tij Alfio Rrotani dhe më pas janë shfaqur së bashku në disa emisione gatimi. Ai jep njëkohësisht mësim në një nga institutet kulinare në vend.
