Për javë të tëra, tensionet kanë qenë të larta në Mesdheun Lindor ndërsa Turqia dhe Greqia kanë kryer manovra ushtarake në zonë.
Presidenti i Turqisë, Recep Tayyip Erdogan, në një telefonatë me Sekretarin e Përgjithshëm të NATO-s, Jens Stoltenberg, ka diskutuar zhvillimet e fundit në Mesdheun Lindor.
Gjatë një bisede me kreun e aleancës, Erdogan bëri të qartë se qeveria e tij do të mbrojë gjithmonë të drejtat dhe interesat e Turqisë, duke theksuar se vendi mbështet një zgjidhje të drejtë në Mesdhe, nga e cila të dalin të fituara të gjitha palët.
Turqia ka dërguar anije kërkimore për të eksploruar për hidrokarbure, në atë që thotë se është shelfi i saj kontinental.
Nga ana tjetër, Greqia e kundërshton eksplorimin turk në Mesdhe, dhe pretendimet e veta territoriale i mbështet në ishuj të vegjël pranë bregdetit turk.
