Ambasadorja e re e SHBA-së në Shqipëri, Yuri Kim pritet të vijë në vendin tonë brenda muajit janar. Diplomatja u konfirmuar këtë të enjte nga senati amerikan.
Pak ditë më parë, e përzgjedhura nga presidenti Donald Trump për ambasadore në Shqipëri tha para Komisionit të Jashtëm të senatit se do t’i stimulojë liderët në Shqipëri që të zgjidhin krizën politike dhe të forcohet perspektiva e hapjes së negociatave në BE.
“Pak miq kanë përqafuar ngrohtë SHBA. Sondazh pas sondazhi tregohet se mbështetja shqiptare për Shtetet e Bashkuara mbetet ndër më të lartat në botë. Pak aleatë kanë qenë kaq besnikë. Trupat shqiptare kanë qenë në anën tonë në Afganistan, Kosovë, Bosnje. Dhe pak partnerë janë po aq të gatshëm të bëjnë më shumë me Shtetet e Bashkuara.
Ne kemi një mik të fortë dhe besnik si Shqipëria, dhe është e domosdoshme që të mbajmë miq si Shqipëria pranë nesh, veçanërisht përballë sfidave strategjike për interesat, vlerat dhe institucionet tona të përbashkëta”, tha Yuri Kim.
Ajo deklaroi se nëse konfirmohet, do të punonte gjithashtu për të nxitur eksportet dhe investimet amerikane në Shqipëri. Ndërsa shtoi se do të inkurajonte gjithashtu Shqipërinë të zbatonte plotësisht reformat në drejtësi, përfshirë kontrollin e figurës së gjyqtarëve dhe prokurorëve.
