Edhe pse ishte një nga shtetet e fundit që u prek nga koronavirusi, numri i të infektuarve në Kosovë është rritur me ritme të shpejta.
Në këto kohë të vështira për vendin, 3 kompanitë më të mëdha afariste nga Peja, ‘Devolli Corporation’, ‘Devolli Group’ dhe ‘Elkos Group’, kanë vendosur të dhurojnë artikuj ushqimorë dhe produkte të tjera ndihmë për qytetarët.
Nën moton “Afaristët pejanë për Kosovën”, nga sot do të fillojë shpërndarja e pakove të cilat do të përmbajnë 300 tonelata miell “Finesa”, 33 paleta qumësht “Vita”, 33 paleta lëngje “Tango”.
Ndërkohë përveç këtyre, “Comodita” ka vendosur t’i dhurojë qeverisë së Kosovës 100 mijë maska mbrojtëse, 1 mijë dyshekë dhe 5 mijë jastëkë.
Shpërndarja e pakove ushqimore, të cilat kapin vlerën prej rreth 500 mijë eurosh do të bëhet në vendbanime të ndryshme të Kosovës. Shpërndarja do të bëhet sipas një orari të caktuar, në mënyrë që të përfitojnë sa më shumë familje.
‘Devolli Corporation’, ‘Devolli Group’ dhe ‘Elkos Group’ urojnë që kjo situatë të kalohet sa më shpejt dhe sa më lehtë, në mënyrë që qytetarët e Kosovës mos të vuajnë nga mungesat në furnizime me artikujt jetikë.
