Ditën e sotme, Kuvendi miratoi me 97 vota pro, ngritjen e Komisionit Hetimor për shkarkimin e Presidentit të Republikës, Ilir Meta.
Ndërkohë, 6 deputetë të pranishëm të seancë votuan kundra ngritjes së Komisionit, teksa pati vetëm një abstenim.
Por, cilët janë këta deputetë?
Kundër
Elda Hoti
Artur Roshi
Lefter Maliqi
Kujtim Gjuzi
Fatjona Dhimitri
Adriatik Alimadhi
Abstenim
Ralf Gjoni
Reagimi nga Presidenca
Menjëherë pas këtij vendimi, ka ardhur reagimi nga Presidenca, nëpërmjet zëdhënësit të Kreut të Shtetit, Tedi Blushi.
Në një deklaratë për mediat, Blushi u shpreh se Presidenca nuk do të njohë asnjë vendim apo veprimtari antikushtetuese dhe antiligjore të Kuvendit, që sipas tij është njëpartiak.
Ai tha se vendimi për ngritjen e Komisionit Hetimor nuk meriton vëmendje dhe është nul. Ndër të tjera, Blushi deklaroi se Presidenti Meta do të jetë në detyrë deri në përfundim të mandatit të tij, më 24 korrik 2022.
Përse u ngrit Komisioni Hetimor
Kuvendi i ka hapur rrugë Komisionit Hetimor që të hetojë lidhur me shkeljet e pretenduara nga 49 deputetë të mazhorancës, të cilët akuzojnë Metën se ka dalë jashtë kompetencave dhe ka shkelur Kushtetutën para dhe gjatë zgjedhjeve të 25 prillit.
Në daljet e tij të shpeshta publike, Meta ka akuzuar mazhorancën se do të tentojë të prishë procesin zgjedhor, teksa bënte dhe paralajmërime të forta, ku thoshte se do t’i pritej dora atij që cënon votën e lirë, apo deklaronte se popullli duhet të rrëmbejë sfurqet.
