Komisioni i Ligjeve ka miratuar kërkesën e qeverisë, për të shtyrë gjendjen e fatkeqësisë natyrore deri më 23 qershor.
Në cilësinë e komisionit përgjegjës, komisioni shqyrtoi projektvendimin “Për propozimin Kuvendit të Republikës së Shqipërisë për dhënien e pëlqimit për zgjatjen e gjendjes së fatkeqësisë natyrore, të shpallur me vendim nr. 243 datë 24.03.2020, të Këshillit të Ministrave.”
Ndërkohë mësohet se nga opozita e re kanë abstenuar deputetët Alban Zeneli dhe Andi Përmeti.
Zv.ministrja e Shëndetësisë, Mira Rakacolli u shpreh se situata nga koronavirusi është nën kontroll falë masave distancuese të ndërmarra nga qeveria. Por sipas saj, lehtësimi i masave mund të çojë në shtimin e numrit të rasteve, pasi një pjesë e të infektuarve janë asimptomatik.
Rakacolli theksoi se nëse do të ketë numër të lartë të rasteve, atëherë do të lindë nevoja për kthimin e masave drastike.
“Për këtë arsye masat që do të merren do të jenë graduale dhe situata do të vlerësohet në dinamikë”, mësohet të ketë thënë ajo.
